देशकाे एक डल्लाे एकता माथि
काेण काेणबाट डलेठाे बज्रिरहँदा
नि:शब्द बनेका ओठहरू,
यतिखेर, एकताकाे नाममा
घाेक्राे च्यातिरहेका छन् ।
यहाँ सिंगाे धरती, जाे
टुक्रा टुक्रामा खण्डित छ
टुक्रा टुक्रामा विभक्त मुलुक
स्वयंमा रंगिन रेखाहरू काेरेर
क्षेत्र, वर्ग, जाति, धर्म, सम्प्रदाय,
अनि रीति थिति र संस्कृति, संस्कारकाे नाममा
ब्यक्ति ब्यक्तिलाई फुटाएर
एकलाे अनि सामर्थ्यहीन बनाइएकाे छ
भाे,
मलाई एकलाे एकता दिवस मनाउनु छैन
कुहिएका अल्छे मुर्दाहरूबाट
सिउँ सिउँ जन्मेका किराहरू
उडुस, उपियाँ र लामखुट्टेहरू
रगत चुसिरहेका छन्
र मानव चाेलाका रक्तबिजहरू
दुर्गाहरूका सतित्व-हरण गर्न
दिउँसै जुङ्गा मुठारिरहेका छन्
यहाँ
विवेक मरेका झाेलेहरूकाे घेराबन्दीमा परेका साेझा जनता
आफ्नै भूमिमा आफ्नैकाे हात बिक्री भईरहेका छन्
र झिनाे अधिकार प्राप्तिकाे आशामा
एक मुट्ठी जीवनकाे लागि कठै,
आफ्नै माटाेमा पराधिन बनेका छन्
यसबेला कुर्सीसंग साटिने खेलमा
चन्द्र र सूर्य पनि
शकुनि दाउमा पर्ने संत्रासमा छ
भाे, बेअर्थ
खाेक्राे एकता दिवस चाहिएकाे छैन
अर्थ रहितकाे दिवस मनाउनु छैन ।
जहाँ माफियाहरूकाे इशारामा देश चलेकाे छ
चाेर डकैत र गुण्डाहरू खुलेआम घुमिरहेकाे छ
जहाँ तस्कर दलालकाे हालिमुहाली छ
जहाँ महँगी र अभावले आकाश छाेएकाे छ
जहाँ घुसखाेरी र भ्रष्टाचारीकाे कमाण्डमा
बेइमान र बलात्कारीले संरक्षण पाउँछ
त्यहाँ, म एकलाेले एकता दिवस मनाउनु छैन
कदाचित, मनाउनै प-याे भने,
हत्याराहरूकाे दिवस मनाओं
घुस्याहा र छुस्याहाहरूकाे दिवस मनाओं
बलात्कारी र भ्रष्टाचारीहरूकाे दिवस मनाओं
स्वाधिनताकाे नाममा पराधिनता दिवस मनाओं
लाेकतन्त्रकाे नाममा लुटतन्त्र दिवस मनाओं
आओं, यसपाली
एकता दिवसमा नेता दिवस मनाओं !
शिवनारायण सिंगल
विराटनगर
