हरेक पाँच पाँच वर्ष नपुग्दै
राष्ट्रिय मेला लाग्ने
मेरो देशमा ,
ब्यापारी बढेर होला
यसपालि फेरि
मेला लाग्ने भएको छ ।
ब्यापारीहरू
मोलमलाई गर्न
गाऊँका झुपडी र
गल्लीहरूमा
कहिल्यै प्राप्त गर्न नसकिने
आश्वासन, झुटको खेती
अनि
अनि मिठा सपना बाँड्दै
घुम्न थालेका छन् ।
बर्सेनि बढ्दै गरेको बेरोजगार
किसानका पीडा र
सहरीकरणले
आक्रान्त पारेको म र
मेरो बस्ती
फेरि त्यही अनुहारका
पछि लागेर थोरै दररेटमा
बेचिँदै छौं ।
हरेकालाई आफ्नो
अस्तित्व बेच्न पल्केको म
यो पटक पनि पहिले जस्तै
बेचिने दाऊमा छु
दास भई बाच्ने मेरा रहर
अझै पूरा भए जस्ता छैनन् ।
म अझै पनि बिक्रीमा छु
म अझै बिक्रीमा छु ।
चिरञ्जीवी काफ्ले
रङ्गेली ९ दोहमना
मोरङ्ग
