पैसाको पछाडी दौडिने खराब कुलत देखियो
ईमान, जमान, प्रतिष्ठा अनि ईज्जत देखियो
सम्मानलाई सस्तो लोकप्रियता बनाउने को,
नियत देखियो औकात अनि हैसियत देखियो ।
१.
असल अनि सहिलाई सधैँ भरि गलत बनाएर
खराव कार्यलाई जहिल्यै सर्वसम्मत बनाएर
भ्रमको दोकान चलाउँदैछन् हेर बिचौलिया
ठग्ने, छल्ने, ढाट्ने अनि लुट्ने नियत बनाएर ।
२.
नौटङ्गी गर्दै यो जालझेल यसरी नै चलिरहन्छ
भेडा अल्मल्याउने खेल यसरी नै चलिरहन्छ
थाहा छैन ग्याँसको पाइप र रेल चल्छ चल्दैन,
तर बेला बेला यो पोखरेल यसरी नै चलिरहन्छ ।
३.
खानुस् है भ्रम मिसाएको पकवान बाँड्दै छु
चाउमिन बाँड्दैछु, म : म: र नान बाँड्दै छु
सबलाई ठूलो बनाउने यो अभियान हो मेरो,
लिइ जानुस्, सिसाको फ्रेम सम्मान बाँड्दै छु ।
४.
नवशिला
बेलबारी -२, नवदेव मार्ग, लालभित्ती, मोरङ ।
(४ पुस २०८२)
